Ik bin Thuur, 16 jaor ald en ik bin gebaore in Venlo. Vastelaovend zit beej ôs al van ‘klein’s aaf-aan in de femilie via mien opa, en mien pap en mam neteurlik. Opa al ald Hoëgheid Jan IV beej Jocus in 1987, pap als ald Garde Kômmandant en mam als ald Adjudant van Jocus Toekôms. En neet te vergaete mien zuske Cielke, as lid van Jocus Toekôms mini Dansgarde.

Hoëgheid Sepp I kin ik al vanaaf det hae is gebaore, door ôs elders. Vanaaf toen hebbe weej altiéd same de vastelaovend gevierd. Alle daag same op paad, mit vuuël serpetinus, sjips en ein glaeske ranja. En neteurlik de sôkkerspin mit de Boerebroélof! Neet gek auk, det weej dus same beej Jocus Toekôms zien gegaon. Vanaaf dit jaor, meug ik zelfs Garde Kômmandant zien en Hoëgheid Sepp Sirremonimeister!  In miene vreejen tiéd bin ik keeper beej ‘de Boys’ van Onder-17 1 en doon ik gaer leuke dinger met Sepp, Yves en al ôs vrinde. Ik verheug mich d’r enorm op, um same mit dees jônges, maar zeker auk mit alle joeksige blaage eine waanzinnig sjieke vastelaovend van te gaon make!