Prins Robert I (Bouten) is 54 jaor en gebaore in Venlo. Nao de liëgere en middelbare schoël en ôndanks interesse in artistieke opleidinge volgde hae Pedagogische Academie in Venlo. De veurnaamste raeje? Hae woel neet weg oét Venlo wao zien hert leet!

Nao inkele jaore in ‘t onderwiés ging hae aan de slaag beej Umroop Limburg waat later L1 woort. Dao kwaam zien ervaring van de Stadsumroop as vreejwilliger beej o.a. TILT van pas.

Aansloétend waas hae ein aantal jaor directeur van Umroop Venlo, det hae verruulde veur de Floriade in 2012. Taegewaordig werk hae Adviseur Bestuurlikke Communicatie beej de Gemeinte Venlo en waordveurder van ’t College van B&W.

Naeve de journalistiek kreeg auk theater eine hiéle belangriëke rol, zoë waas hae te bewonder in ‘t Volkstheater Frans Boermans, de Venlose Revue, De Tent van Bell, de Passiespeule en beej Teniëlgroep Mestreech.

As zenger stond hae regelmaotig op Jocusbuun. Neteurlik same mit Leta Bell zông hae “Ik Plök d’n daag” in 1999 en “Ik bin Venlonaer” in 2000 en woorte twië kiër twiëde op Opus Jocus Leedjesaovend. Same mit Ruud Stikkelbroeck, Bart Houtermans en Fred Honig brach hae in 2014 “Veurbeej” en solo zông “Gôlde Vleugels” in 2017.

Al hiël lang is hae aktief beej de Hockeyclub in Venlo. Iërs beej VHC op dn Herungerberg en noow beej de fusieclub Hockeyclub Delta Venlo. Dao ônstond auk d’n band mit Adjudant Max, Adjudant Martijn kôs hae al waat langer vanoét Kefeej de Galerie. Ein absoluut hoëgtepunt waas’t organisere van de Boerebroélof mit VHC in 2016 waovan hae Sirremoniemeister moch zien. 

Prins Robert I is 15 jaor teammanager gewaes van ‘t 1^e hiëre elftal beej VHC en Delta Venlo. Noow is hae bestuurslid hockey van de fusieclub HC Delta Venlo en wuurt door de jeug “Baas Hockey“ geneump.

Hoewaal hae vuuël in de belangstelling steit en bekindheid haet is hae auk gaer op zichzelf en koestert de hiele kleine momente: beejveurbeeld de reaksie van Börgemeister Scholten beej ‘t intern veurstelle. “Door mien beroop as waordveurder beej de Gemeinte Venlo werk ik dök same met de börgemeister. Idder jaor is hae waal niejgierig nao wae Prins geit waere en vruuëg mich dao auk dökker nao, asof ik dèt idder jaor zoel weite. Noow is ‘t spelke nog leuker.” Gevraog naor zien verwachtinge as Stadprins van Venlo: “Ik haop mien geveul veur de Vastelaovend op ein wiés euver te kinne bringe det idderein dae ‘t Venloos hert op de juuste plaats haet zitte zich daodoor bevange veult. Netuurlik is ‘t veur meuge gaon op vuuël evenemente en beejeinkomste en oéteraard op de Prinsewage door de stad te meuge gaon fantasties. Maar ‘t geneete van de kleine momente, de ônverwachte ôntmoetinge en reaksies van idderein bliéf aevel veur mich hiël biézônder. Zoë spits ik mich al lang op de middaag in de Miëuwbaemp wao mien mooder woënt. Det zien veur mich de pareltjes van ‘t laeve en de Vastelaovend. Dao geit mien hert sneller van kloppe. En dan mak ’t niks oét wao desse vanaaf kumps, welke taal desse spriks, wie desse d’r oét zuus, wae d’r naeve dich steit en wae d’r van dich helt. Want ’t Venlose vastelaoveshert klop beej idderein ’tzelfde! Det is de betauvering van de Vastelaovend. Det ik dit same mit mien twië hertsvrinde as Adjudante – en eur femilies – meug gaon belaeve is einen druim. Ik weit zeker det zeej mich in alles zulle ôndersteune en mich mit twië veut op de aerd zulle halde zoëdet ik neet gaon zweve op Gôlde vleugels.”