Adjudant Paul Joosten
Adjudant Paul Joosten is 48 jaor. Same mit zien vrouw Charlotte (Lot) hebbe zeej 2 döchter, Mees van 17 en Bloem van 15 jaor.
Nao de Heilig Hart schoël liërde hae op ‘t Sint Thomascollege auk zien vriendin Lot kinne. Daonao trok hae nao de Hoëgeschoël in Eindhoven. Heej woort ein communicatieopleiding mit good gevolg aafgeslaote. Via ein baan beej ein groëte bank werkde hae miër as 20 jaor beej verschillende organisaties in diverse HRM-functies.
Begin 2019 en nao haos 25 jaor in loëndeens te hebbe gewerk is Paul begôs as zelfstandig ondernemer mit Move | adviespraktijk veur mins en organisatie. Zien twië vrinde richte zich op alles van plante, greunte en fruit. Hae rich zich op de persuuënlikke greuj van minse en op de greuj van teams en organisaties.
Vastelaovend haet hae same mit zien elders liëre viere in de toenmaolige vastelaovestempel Wilhelmina. Dao rende en sprong hae rond wies det pap en mam muug ware en naor hoés ginge. Maar auk beej ‘t Jeugkoër van de Heilig Hart parochie woort Vastelaovend flink geliërd en gevierd. Al op jonge laeftiéd trok hae mei in de Groëten Optoch mit ziene Vrindegroep ‘t Gedeuns. Wie de kinder gebaore woorte ging de babymelkpoejer en ein thermoskan heit water mei in de bolderkèr. Auk ging hae dök same mit vrind en noow Hoëgheid Marcel (dae hae net as meide-Adjudant Jos beej de Ronde Taofel had liëre kinne) as faatse mei in de Groëten Optoch. In 2009 wônne zeej same de Veldeketrofee.
Net as zien twië vrinde haet auk Paul genaote van d’n tiéd tösse ‘t jaozegge (binne 11 sekônd) begin oktoëber en d’n Hofbal. “Vanaaf ‘t moment desse gevraog wuurs gebeurt d’r waat mit dich. Inens makse onderdeil oét van ‘t mysterie rondum ein Jocus Dreejspan. In gedachte flits de Vastelaovend aan dich veurbeej en perbeerse dich ein veurstelling te make van det waasse mei geis make.”
Paul kiék d’r nao oét: “Vastelaovend is ein fees veur idderein. Neteurlik môt dae deils geregeld en georganiseerd waere. Maar veural de spontane joeks en jen môt op de veurgrond staon. Dök zit dit in de gewoëne kleine en ônverwachde momente. Dit fees vierse mit jônk en alt en met groët en klein. Mit dien gezin, vrinde en idderein daesse spôntaan taegekumps. Vastelaovend druuëgs mei in dien hert en ik haop dan auk det weej as Jocus Dreejspan 2020 ‘t hert van de minse meuge rake.”
