Adjudant 2 Pascal Horvers is 45 jaor en al miër as 20 jaor same mit Anouk. Zeej hebbe 3 blaage, 2 jonges Gies (17) en Mouk (12) en ein maedje Sam (15).

Door ‘t werk van zien vader (gebaore en getaoge Venlonaer) haet hae 2 ½  jaor in Brüggen, Pruusses gewoënd. Oëtintelik zien zeej in Bliërick gaon woëne wao hae op de Roncallibasisschoël zoot. Op de MAVO op ’t Blariacumcollege zoot hae vanaaf de 3^e klas al beej Bram in dezelfde klas. Nao ’t Intervencollege de HBO opleiding Bedriëfskundige informatica rolde hae de logistieke sector in. Momenteel werk hae werkzaam beej Yusen logistics wao hae verantwaordelik is veur alle commerciële aktiviteite in de Benelux. In ziene vreejen tied is hae veurzitter en trompetis beej Joekskepel Dreej Daag Um, en begeleider (chef bidon) beej ‘t Handbalteam van Gies (Hiëre 2, HC Groot Venlo).

Tiédes zien jeugjaore in ‘t Vastelaovendkamp en de Klingerberg waas lid van scouting Ferron en kwaam hiël vuuël in ‘t Muspelheim. Dao is auk de vrindschap mit d’n Hoëgheid ôntstaon.

“Weej hebbe same nogal waat streke oétgehaold en mit name vuuël plezeer belaef. Neet allein in de buurt maar auk mit voetballe op ’t liëgs dinkbare niveau. De wedstriëde die weej hebbe gewônne zien op twië hand te telle. Maar in de derde helf ware weej ônverslaonbaar.”

Zien t gezin neemp ein biézôndere plaats in: “Weej kinne ein hiële sterke gezinsband. Weej laote mekaar auk erg vreej en zien hiël aope en direk nao mekaar toe. Leege is in ôs gezin strik verbaoje. Ik heb mien kinder dus waat oét môtte legge euver al die smoesjes die weej vanaaf ind september hebbe môtte verzinne um ‘t grutse geheim van Venlo in stand te kinne halde.”

Auk beej de vrindegroep/spaarkas de Flodderkas (same mit d’n Hoëdheid) ,’t voetbalklupke , Joekskepel Dreej Daag um en vrinde en femilie meus minnige kiër waat bedach waere um niks te verraoje: “Ondanks det ik enorm heb genaote van de veurbereiding kwaam aan die biézôndere periode toch ein ind. De ontlading waas beej ‘t intern veurstelle en d’n Hofbal erg groët. Weej zien gewind um Vastelaovend te viere mit vrinde, femilie en ôs gezin. Dit is auk gelök wie ik Adjudant waas beej De Kwas in 2016. Weej wille ôs kinder zoëvuuël meugelik betrekke beej alles waat weej de kômmende waeke gaon belaeve. Same mit ôs maedjes en de kinder van Bram I en Marc zien zeej ôzze eige Raod van Elf zoëas in de Träötteikening is truuk te zeen. Ik haop det weej as Jocus Dreejspan de vastelaovend mit idderein kinne belaeve zoëas vastelaovend bedoeld is. Gén genäöl, alle zörg op ein kesje en geneete van idder moment. Mit ein breije lach van oër wies oër.”