Adjudant Martijn Hendrikx

Adjudant 1 Martijn Hendrikx is 43 jaor en de aldere (en zoë vindt hae zelf de verstendigere) broor van d’n Hoëgheid. Hae is getrouwd mit Marianne en hebbe same 4 blaag Sophie (19), Stan (16), Floris (16) en Jesper (14).

Nao eine werkzame start beej Lagotronics in Venlo is hae noow al ein aantal jaor algemein directeur van SLV Nederland, gespecialiseerd in verleechting. Hae umschriéf zichzelf as eine verbinder dae ‘t opbouwe en innovere zeker neet vraemp is.

Net wie zien broor Prins Gijs I zit auk Martijn ’t sociaal-maatschappelik laeve in ’t blood: “Ik bin eine sociaal bewaoge man. Gaer zet ik mich in veur de samelaeving, waobeej minse mien biézôndere aandach hebbe. Beejveurbeeld as bestuurslid van de VVV Foundation en de Raod van Advies van ‘t Zomerparkfees. Sportief kin ik mien energie kwiët mit golf en mit hardlaupe. Dan maak ik de kiëbus laeg en kin ik loskômme van alle daagse beslômmeringe. De snel opkommende sport padel haet mich auk in zien greep gekrege. As alles good verlöp kin ik komende veurjaor ein aantal padelbane aan laote legge in Venlo.”

Net wie beej d’n Hoëgheid en zien meide-Adjudant Sef zit ‘t bourgondische laeve good. “Wie mien broor mich vroog as Adjudant meus ik efkes beejkômme: neteurlik heb ik volmundig “jao” gezag! Ik dach al geliék det Sef – groëte vrind en zakelikk  rechterhand van Gijs – d’n twiëde Adjudant zoel zien. De aagelaupe twië-en-ein-half jaor goove eine ziër biézôndere tiéd wao-in alles in ‘t geheim meus gebeure. ‘t Leege en smoesjes verzinne is haos ein twiëde neteur gewaore. Hae vervolg: “Maar noow staon weej mit ôs dreeje klaor um d’r eine ônvervalsde Venlose Vastelaovend van te make. Same mit mien broor Gijs en vrind Sef ’t Jocus Dreejspan van 2023 te meuge vorme is fantasties! En veural mit twië bein op de grond de Joeks en gezelligheid oétstraole die de Venlose vastelaovend zoë uniek mak!”