Prins Mark I (Theewen) is 53 jaor en getrouwd mit Maartje. Same hebbe zeej 4 blaage: Mijntje (21), twiëling Ties en Fien (18) en Mats (13).

Mit zien zus greujde hae op in ein werm gezin op de Zandstraot. Mooder kwaam oét ein meziékaal gezin, de femilie Bartels. Pap werkde hard: via ‘t femieliebedrief in bekkeriegrôndstoffe branche en koelinge woort in 1986 Theewen Koeltechniek gebaore.

Vader Guus regeerde in 1994 as Prins Guus I beej de Wien en ’t is in ‘t jeughoés op de Maagdenberg wao d’n Hoëgheid Mark de vastelaovend liëre viere. Nao de liëgere en middelbare schoël (wao de vrindschap mit Adjudant Paul is ôntstaon) ging hae nao de MTS electrotechniek. Al flot heejnao ging hae beej pap in ‘t bedriéf werke. Nao ervaring beej andere werkgaevers, haet Mark in 2000 de zaak euvergenaome: noow is hae directeur/eigenaer van VenloVerkoelt /Theewen Koel-, en Klimaattechniek

In zien vreeje en jonge tiéd is hae beej de scouting gewaes en onder andere jeugtrainer gewaes beej de Venlosche Boys. Same mit vrind René zoot hae beej ein kaokklup. Darte waas ein andere hobby van um. Beej de Irish Pub haet hae met minnig piëlke gebrobeerd ‘t bord te rake. Beej de Rotary is hae auk ein ziër gewins en gewaardiërd lid.

“Naeve mien werk en sociale activiteite bin ik eine echte femilieman. Ik kaok auk gaer, auk veur vrinde en staon smeis oore in de keuke.

Mit eine gooje bourgondische inslaag vind hae ‘t belangriék um waat te kinne beteikene veur de meidemins: “Gaer neem ik ‘t op veur de zwaakere in de samelaeving en gaef ik kanserme minse gaer ein extra kans”  

Alzoë eine man met ein groët het. Dit kump auk in zien Hoésorde oétdrökkelik nao veure. “As kleine hens heb ik mit aope mond staon te kiéke nao Prins Bart I ( den Biesen). As ik dèt toch ens mei zoel meuge make dach ik toen. Ik spits mich op alles waat de kômmende waeke op ôs aaf geit komme. Vanaaf d’n Hofbal wies aswoensdaag wille weej de Joeks en ‘t plezeer oétdrage vanoét os hert. Op ein wiés die dees stad verdeent en die Jocuswaerdig is. Same met mien twië vrinde Paul en René de ker gaon trekke. Neet baove de minse, maar same mit alle vastelaovesvierders. Weej gaon ôs bes doon um ôs euveral te laote zeen. Lekker met twië bein op de grond bliëve en de tradisie en historie van Jocus en de unieke Venlose vastelaovend mit ôs ganse hert oétdrage. Zeker auk op de momente wao weej de minse die zelf neet miër in staot zien aktief deil te neme aan de Vastelaovend waat plezeer kinne gaon bezörge en eur Venloos vastelaoveshert weer laote bleuje. Weej umerme de vastelaovend. ‘t Môt eine Vastelaovend waere wao idder hert sneller van geit kloppe. Dao gaon weej alles veur inzette, maar miër nog um same mit ôg ôs ônder te dompele in dae schoëne Venlose vastelaovend: Det wuurt lache!”