Prins Marcel II (Verdellen)

Jaor 2020

Prins Marcel II (Verdellen) is 48 jaor en same mit partner Aaf en eur 5 maedjes, Jip, Julia, Jana, Anina en Fedra in de laeftiéd tösse 14 en 19 jaor.

As directeur/eigenaer is hae werkzaam in zien bedriéf Satori en hilt zich bezig mit de import van exotisch fruit en greunte. Hae kump oét ein gezin wao, door de hobby van zien vader Ben, de meziék centraal stond.

Nao ziene schoëltiéd en waat umzwervinge, en de verplichde deenstiéd, volgde hae ein opleiding aan de HTS in Breda. In dae’n tiéd verdeende hae as student waat cente beej op de veiling in Grubbenvors. Dao merkde hae euver ein gooje handelsgeis te beschikke. Hae kreeg door de inkaup van importprodukte ein groët internationaal netwerk en woort door eine klant in 2000 gevraog um ein groët projek in Spanje op te gaon zette. Die 6 jaor in Spanje loog d’n basis veur zien persuuënlikke en zakelikke ôntwikkelinge.

Einmaol truuk in Venlo kwaam hae via de Ronde Taofel in kôntak mit Jos Gipmans, dae vanaaf det moment ein van zien beste vrinde is gewaore. In 2013 woort um door Satori gevraog um dit bedriéf mei veurt te zette. Thoés is door ziene pap de meziék mit de paplaepel ingegaeve. Det makde det, nao ein auditie thoés in d’n haof, hae de zenger van Jocus Hofkepel is gewaore. Det haet hae 11 jaor mit vuuël plezeer gedaon.

Same mit vrind en noow Adjudant Paul Joosten trokke zeej jaore as faatse mei in de Groëten Optoch en hebbe auk ens de Veldekepriés gewônne. Zeej hebbe same auk vuuël leedjes gezônge en eine gas kiër beej de veer winnende Jocusleedjes gezaete.

En dan now t hoëgste Vastelaovesamb van Venlo meuge gaon vervölle.
Prins Carnaval 2020! Van Jocus!
“Vanaaf det ik volmundig “Jao!” heb gezag taege Vors Joeccius heb ik genaote van alles waat gedaon en geregeld meus waere. ‘t Ware biézôndere aovende en momente. Ein spel waat ik mit vuuël plezeer heb gespeult, auk al heb ik mich dök op de tong môtte biéte!

Ik spits mich op alles waat de kômmende waeke op ôs aaf geit kômme. Vanaaf d’n Hofbal wies Aswoensdaag wille weej de Joeks en ‘t plezeer oétdrage aan en euver de van origine vestingstad Venlo. Op ein wiés die dees stad verdeent en die Jocus waerdig is. Same mit mein twië vrinde de ker gaon trekke. Neet baove de minse, maar same mit alle vastelaovesvierders. Weej gaon ôs bès doon um ôs euveral te laote zeen. ‘t Môt eine Vastelaovend waere um gruuëts op te zien!”