Adjudant Marc Buskes

Adjudant 1 Marc Buskes is 46 jaor en same mit zien Linda hebbe zeej 3 jônges Thijn (13), Mees (11) en Puk (9 ).

Nao Basisschoël ‘t Ritjen, de HAVO op ‘t Blariacumcollege en de Meao volgde hae aan de Fontys in Eindhoven de opleiding Bedriéfscommunicatie. Hae haet zien jeug doorgebrach in ‘t elderlik hoés aan de Mollierelaan in Bliërick.

“Ik heb ein hiele tôffe jeug gehad. Same mit mien broor hadde weej ein erg hech en werm gezin. Wie ik zes jaor ald waas bin ik gaon handballe beej Handbalclub Bliërick. Wie ik alder woort woel ik op ein zoë hoëg meugelik niveau sporte. Waat det betref wiek ik dus nogaal aaf van mien twië vrinde Bram en Pascal. Dit jaor bin ik 40 jaor actief lid binne de handbalclub, det vanaaf kômmend sezoen HV Fortes Venlo geit heite.” Daonaeve is hae trainer beej de Onder-12 van Venlosche Boys wao zoon Mees voetbalt. Ens per waek maak ik auk ein oetstepke naor ‘t zaalvoetbal same mit HH en A2.

Marc is werkzaam as Senior Account Manager beej Jungheinrich, ein bedriéf waat zich rich op de interne logistiek in de breidste zin van ‘t woord. Mit name ’t minselikke kôntak is waat um as sociale en positief ingestelde persoën dao ’t meiste aansprik De vrindschap mit Bram is ruum 25 jaor geleeje ontstaon. Marc is ein echte femilieman waobeej gezelligheid hoëg in ‘t vaan steit. Die gezelliheid zuk hae mit idderein. Van ‘t geheimzinnig doon in de veurbereidingsperiode haet hae van idder moment genaote zeker in ‘t ‘Kefeej Kwant’ beej Bram achter ‘t hoés en op andere geheime plaatse. “Vanaaf ind september hebbe weej vuuël aovende beejein gezaete. Steeds opniëj meus ik veur de kinder smoesjes verzinne wao ik noow al weer haer meus: Handbalklup of de optochklup . Naodet De Klein Kernelkes neet miër mit d’n optoch meitrokke zien weej mit ein aantal vrinde ein nieje groep begôs: ‘Wie Weej’ waomei weej alweer inkele jaore meitrekke. Wies 2017 leep hae mit De Klein Kernelkes – dé Waagebouwersvereinging van Venlo. Dit jaor zal hae as letste meitrekke op de Prinswage van Prins Bram I en meide Adjudant Pascal.

“Dit allein liék mich ein biézôndere en unieke ervaring. Ik spits mich aevel op alles waat d’r aan steit te kômme… Neteurlik alle bezeuke, maar zeker de kleine en ônverwachde momente, ‘t spôntaan mit idderein klasjenere en ein klepke drinke. Gewoën alles. De Venlonaere eine groëte lach op ‘t gezich tauvere en mit name de minse die de letsten tiéd weinig raeje tot lache hadde auk weer laote geneete.”