Prins Gijs I (Hendrikx)
Prins Gijs I (Hendrikx) is 37 jaor en haet twië blaage Sjuul (9) en Nanne (8). Same mit vriendin Ellen geneete zeej van de moëie dinger die ‘t laeve bringk.
In ’t dageliks laeve is hae directeur/eigenaer van ’t Theaterhotel, Mr. Jigs en ’t Ald Weishoés. Alzoë eine bourgondische Hoëgheid dae gasvreejheid hoëg in ’t vaandel haet.
Auk op maatschappelik vlak is d’n Hoëgheid genne ônbedinke. Hae waas 7 jaor betrokke beej de Young Business Club van VVV, ‘t Toeristisch Platform Maasduinen/ Venlo, de Aspergerie, VVEV en 4 jaor veurzitter van ‘t MKB Noord Limburg en nog diverse initiatieve op maatschappelik gebied.
Vastelaovend viere duit hae ‘t leefste mit vrinde en bekind. As lid van vrindeklup de Pimpelaers moch hae zelfs de iërvolle funksie van Höfkeuning vervölle. Zoë kos hae alvas ein bietje oefene van alles waat um in zien regeerperiode as Jocusprins te wachte steit.
“Geluif ‘t of neet. Op 16 september 2020 – miene verjäördaag! – kwaam Vors Joeccius XI mich fillicitere en vroog mich of hae ’t nieje Mr Jigs moch zeen. Op ein van dees kamers woort de vraog der vraoge gesteld. ’t Waas onbeschriéfelik waat d’r toen door mich haer ging! Weer onder truukgekomme meus ik zoë normaal meugelik doon. Det waas bes lastig. Medein daonao heb ik mien broor Martijn en vrind en collega Sef gevraog of zeej mien adjudante woele waere. ’t Jocus Dreejspan 2021 waas gebaore. Dachte weej… De veurbereidinge woorte door de pandemie aafgebraoke. Wie groët ôs teleurstelling waas is amper te beschriéve. Ein jaor later woort de draod weer opgepak. In de gezellige aovende vol mysterie en geheimzinnigheid woort alles in stelling gebrach veur ‘t Dreejspan 2022. Ut leep veurspoedig en de vaart zoot d’r good in. In de waek veur Kersmis zoote weej beeiein um de letste puntjes op de I te zette… Aevel weer die groëte teleursteling: auk de vastelaovend 2022 zoel neet door gaon. Waat d’r toen door ôs haer is gegaon zal ik maar verzwiége. Wie vraemp waas ‘t dét op ‘t lets toch bleek det d’r eine aangepasde vastelaovend gevierd moch gaon waere. Wie dök det ik gedach heb aan wie ‘t had kinne zien wilt geej neet weite. Aevel noow zien weej ’t Jocus Dreejspan van 2023!
Ik verheug mich d’r op dit fees same mit mien Ellen te viere. Intelik kin ôs vastelaovesscheep waat twië en ein half jaor haet rondgedobberd de Jocushave binne vare. Jaorelang heb ik ‘t mit twië vrinde d’r euver gehad wie ‘t zoel veule um oëits op de Prinsewage te meuge staon. Det geit noow werkelikheid waere. Maar ‘t allermeiste verheug ik mich d’r op um mit alle Venlonaere ‘t Vastelaovesfees te meuge gaon viere. Neet baove eur, maar erm in erm lekker doën beejein. Ik kiék oét nao alle bezeuke, maar zeker auk de spôntane momente. Ik haop um same mit ôg op ein spontane wies de schaaj van de letste twië jaor diék en döbbel in te haole: want det is ôngetwiéfeld Good veur ’t Gemood”.
