D’n Opstaeker 2025: ein ôntwerp van Albert Kiefer

Noow de nieje leedjes van kômmend jaor weer bekind zien, kinne weej aaftelle nao de äöpening van ein niej vastelaovesseizoen. Beej dae start op d’n Elfde van d’n Elfde wuurt neet allein ’t nieje vastelaovesseizoen op gang geschaote, maar is auk de niejen Opstaeker verkiégbaar. Ein sieraod, det inmiddels onmisbaar is veur idderein in de gemeinte Venlo dae de vastelaovend ein werm hert toedruuëg. Dit jaor is gekaoze veur de kreatieve doézendpoët Albert Kiefer.

Albert zoog ’t laevesleech op Steyl, maar woort al vlôt mitgenaome naor Belvend. Dao haet hae ruum 35 jaor gewoend, veurdet hae oétintelik in Blierick terech kwaam.
Albert is getrouwd mit Niek, “ ’t maedje van Sounds”, en same hebbe zeej twië kinder: Bodi en Ivy. Nao zien middelbaar onderwiés en ein jaor in deens, is Albert aan de slaag gegaon op de kunstacademie in Mestreech. Teikene waas in zien jongste jaore de grutste hobby, en Albert koos d’r veur um nao de kunstacademie te gaon. Op good bedoeld advies van zien mam, haet hae dao oétintelik de richting van lieraar gekaoze, “want dan hesse mier zekerheid jông”.

Ein videoclip van de Dire Straits wakkerde aevel ein vlemke aan um toch waat anders dan lesgaeve te gaon doon, ein clip die gemak waas via de computer. Dét waas dé trigger veur Albert: Hae is inmiddels al jáóre professioneel graficus (al vlôt as zelfstandige), mit onder andere prachtige opdrachte as ’t ontwikkele van ein visualisatie van ’t alde Fort Michel en ’t grafisch verbeelde van ein niej legervoertuig veur Defensie. Heejbeej steit grafische nauwkeurigheid in ein hoëg vaandel.

In 2016 kwaam de heimwee nao ’t alderwetse teikene. Hae begôs opniej, net wie vruuëger mit ein schetsbook en waat kleurkes. Mit zelfopgelagde discipline (Iddere daag 1 teikening) kreeg dae hobby niej laeve, Ein hobby mit groëte gevolge: Waereldwiéd wuurt hae gevraog veur cursusse en d’r is zelfs ein book van zien kreaties. Det is mit namelijk gericht op unieke schetse van gebouwe, veural vuuël binne de Gemeinte Venlo. En daomei teikende hae zichzelf “in the picture” van D’n Opstaeker.

Anders dan andere jaore haet de nieje ontwerper iérlik gezag neet zoevuuël mit vastelaovend. Vruuëger as kind waas hae wal gaer te zeen as Kojboj en Superheld, maar daonao verwaterde det. Tóch kint hae ’t geveul van vastelaovend prachtig belaeve én oétbeelde, det bliek oét ’t ontwerp van D’n Opstaeker 2025. Twië waerelde kwaame heejbeej same (Grafisch en Schets), waat resulteert in ein prachtig 3D ontwerp van ein ziér joeksig speldje, wao iddere vastelaovesvierder zich beej aan kin sloéte.

D’n Opstaeker 2025 is vanaaf d’n Elfde van d’n Elfde verkriegbaar via de samewerkende vastelaovesvereiniginge. De opbrings kump ten bate van de vastelaovend binne de ganse Gemeinte Venlo.