Biézôndere ônderscheidinge op Jocus Laudatio
Tiédes de Laudatio, veuraafgaond aan de Groëte Prônkzitting had ein ziër speciaal moment plaats. Veur eur boétegewoëne verdeenste veur Venloosch Vastelaoves Gezelschap Jocus en de Venlose vastelaovend, woorte viéf ‘Jocus monumente’ door Vors Joeccius XI op speciale wiés geiërd.
Jack Schatorjé (74) is al van jôngs aaf aan verbônde aan de vastelaovend. Groët gegreujd beej Jocus Toekôms, wao hae zelfs Vors Joeccius Junioris waas. As jaorelangk gewaardiërd lid van Jocus’ Joeks Kemissie kneurde hae veur- en achter scherme op mining Jocus evenement. Neet weg te dinke op de buun van Elf van Elf, jaorelangk veurzitter van ’t Hofbal comité. Bestuurslid en hoeder van de Vrinde van Jocus Toekôms en al miër as ein decennium steun en toeverlaot van Vors Joeccius XI tiédes de prenatale fase van vuuël Dreejspanne.
Veur zien verdeenste is Jack Schatorjé bevorderd tot Kômmandeur Gôld mit Ster in de Orde van d’n Haan.
Daonao had Vors Joeccius XI ’t veurrech um maarleefs 4 minse op biézôndere wiés te in de schiénwerpers te zette:
Rudi Viertel (48) waas 11 jaor Baas Jan oftewaal veurzitter van de Technische Kemissie. Hae is neet allein de grutste Baas Jan oét de Jocus historie, aevel 11 jaor langk waas hae ’t gezich en oéthangbord van de TC: eine groep harde werkers en kreatieve geiste die hae al die jaore leiding haet gegaeve. Binne de Raod van Elf bleek Rudi eine gooje en verstendige bestuurder mit ’t Jocushert op de gooje plek. As ambassadeur van Jocus beej de Gemeinte Venlo en de euverlegge mit de Boétezitting haet Rudi vuuël beteikenisvol werk verzatte. Einen echte Baas Jan oét ’t juuste hôlt gesneeje.
Nao auk 11 jaor noom Roel Bisschops (52) aafschied as Marquis Rümeschläger, oftewaal veurzitter van Jocus’ Joeks kemissie. As Raods- en bestuurslid van Jocus haet Roel zien spaore miër as verdeend. Mit diverse initiatieve haet hae mit de Joeks kemissie verniejing en verandering gebrach, zônder de sjiek, ’t niveau en de tradisie van de vereiniging Jocus oét ’t aug te verleere. As Raodslid altiéd aeve kritisch as positief en ein veurbeeld. Alzoë 11 jaor langk eine groëte Jocusman.
Max Curvers (50) haet in zien 11 jaor as Raodslid twië Raodsfuncties bekleijd. As Burggraaf Pottekiéker, oftewaal veurzitter van Jocus’ Pers & Propaganda kemissie goof hae invölling aan de publicaties en alle uútinge in de media veur Jocus. Daoveur stond hae aan de lat van ’t Kommissariaat Riej & Traksie en auk dao haet hae door zien ôneuvertroffe enthousiasme en inzet de vereiniging gedeend.
As verbindende factor mit de Boétegewoëne Boétezitting haet Max vuuël werk verzatte en de belange van Jocus op miër dan veurtreffelikke wies bewaak. Mit rech einen échte Jocus doézendpoët.
Bram Holla (48) is eine alleskinner. As zenger, buuttereedner en teniëlspeuler wet hae minse te ammeseere. Aevel zien grutste rol waas die van Sirremoniemeister van Venloosch Vastelaoves Gezelschap Jocus. 14 jaor langk ging hae ’t Jocusgezelschap veur. Mit ziene breije lach en zien bel makde gans Venlo vreeje baan veur um. Hae brach zittende en staonde döbbele en dreejdöbbele viéfklappe oét. Op zien gans eige wiés, mit zien guitige snoét en vol humor en geveul veur joeks. Daonaeve is hae ein van de initiatiefnemers van Jocus Joetsaovend en is nog altiéd op vuuël vlakke aktief binne de Joeks kemissie. Altiéd mit de lach aan de vot en veur de Venlose vastelaovend.
Veur eur boétgewoëne verdeenste veur Venloosch Vastelaoves Gezelschap Jocus en de Venlose vastelaovend haet Vors Joeccius XI de hiëre Rudi Viertel, Roel Bisschops, Max Curvers en Bram Holla beneump tot Kômmandeur in de Orde van de Zwalm.
Van herte perfitsia!


