Op maondaag 14 september haet veurzitter Roel Versleijen ônderwiel de Algemeine Leejevergadering van Venloosch Vastelaoves Gezelschap Jocus zien vertrek as Vors Joeccius XI en veurzitter aangekôndig. Versleijen zal nao ’t kômmende vastelaovessezoen de veurzittershamer en Vorstescèpter euverdrage. 

Op 30 mei 2016 woort Roel Versleijen door de leeje van Jocus unaniem gekaoze tot Vors en veurzitter van de vereiniging. Nao zien installatie op zondaag 4 september van det jaor, moch hae op d’n Hofbal van 2017 ziene iërste Prins Carnaval oétroope in de persoën van Lex Uiting, auk waal Prins Lex I. Tiën jaor en ach Jocus Dreejspanne later besluut Versleijen det ’t tiéd is veur ein nieje generatie. “Ik bin dankbaar veur waat weej as Jocus in de letste 11 jaor hebbe bereik. Asse zuus wao Jocus as vereiniging noow steit bin ik dao hiël gruuëts op. De vastelaovend bleujt, Jocus is auk op vuuël fronte gegreujd. Daorum veult dit noow as ’t juuste moment um nao vastelaovend miene scèpter en veurzittershamer door te gaeve. Ik bin daorum vol vertrouwe op waat de toekôms bringe zal.” 

Ônderwiel de Algemeine Leejevergadering woorte de Jocusleeje auk direk meigenaome in de procedure die noow wuurt gestart. Vanaaf Aswoensdaag kin men zien interesse in de functie van veurzitter van Jocus kinbaar make waonao de procedure wiejer vorm zal kriége. Oétintellik zal de nieje veurzitter medio 2027 waere gekaoze op ein Biézôndere Algemeine Leejevergadering. Vlak veur ‘t van ’t nieje vereinigingsjaor 2027-2028, in september volgend jaor, zal de installatie plaatsvinde. 

Naeve ’t niejs van Roel Versleijen kondigde auk Bram Holla zien vertrek aan. Hae stop as Sirremoniemeister van Jocus. Holla dae 14 jaor mit de bel houwde, tössedoor in 2015 Adjudant waas beej Prins Ruud II in 2015 en zelf in 2024 de scèpter zweijde as Prins Bram I, goof maondaagaovend de bel door aan zienen opvolger Baer Hendrix. 

Maondaag woort door de vereiniging aafschiéd genaome van ein dreejtal bestuursleeje: Nao perciés elf jaor noome Rudi Viertel, Roel Bisschops en Max Curvers aafschiéd as bestuurslid van Jocus. Viertel waas elf jaor veurzitter van de Technische Kemissie en wuurt opgevolg door Jeroen Driessen. Bisschops zweijt nao elf jaor aaf as veurzitter van de Joekskemissie, die rol wuurd vanaaf noow ingevöld door Loek Thijssen. Max Curvers waas auk elf jaor bestuurslid, waovan de letste twië jaor as veurzitter van de Pers & Propaganda kemissie, die noow wuurt euvergenaome door Maarten Bastiaens. 

Neet allein bestuurlik geit ’t Jocus veur de wind. Ônderwiel de jaorvergadering woorte leefs 66 jubilarisse in ’t zunke gezatte. Leeje die al 11 jaor lid zien, maar auk viéf leeje die al 55 jaor lid zien van Jocus. 

Mit de Algemeine Leejevergadering is ’t vereinigingsjaor veur Jocus van start gegaon. Euver ein kleine twië maond zal ’t Vastelaovesseizoen officieel waere ingeschaote op Elf van Elf op de Mert veur ’t Stadhoés.