Boerezôndaag

Daags nao ’t Boeremoosbal vindt in ‘t kloësterkwarteer de Boerezôndaag plaats: eine gezelligen daag veur de ganse femilie min ônder andere ‘t Krense in Domani, wao geej ‘t niej Boerebroélofsgezelschap van ‘t Zomerparkfees kint fillicitere en gezellig kint naopraote euver ’t Boeremoosbal.

In de Flôddergats en umliggende kefees is de gansen daag live muziek, en vanaaf Domani nao ‘t Flujasplein kint geej terech veur alles waat geej nuedig heb veur kômmende vastelaovend op de vastelaovesmert.

Na jaore van “Krense” in de Maaspoort wuurt dees resepsie dit jaor in ein niej jeske gestaoke. As niej lokasie is gekaoze veur ‘t intieme Domani. Naeve de zaal binne, zal auk de umgaeving van ’t Kloësterkwarteer mit zien kefees betrokke waere.

Um 11.30 oor wuurt aafgetrap mit ‘t ôntvange van ’t niej Broédspaar mit eur gezelschap ônder muzikale begeleiding van de Hermenie en Jocus Hofkepél. Wie ’t d’n broék is, viert ‘t Boerebroélofsgezelschap, dit jaor ’t Zomerparkfees, zeej halde eur resepsie in Domani, waonao weej mit eur op joets gaon tösse de kefees in ‘t kloësterkwarteer.

Vanaaf 13.00 oor zal boéte ‘t Boerevastelaovesfees los gaon op en rond ‘t Dominicanenplein; dit is veur iddere vastelaovesvierder vreej toegankelik. Beej de deilnemende kefees (De Klep, De Keizerin, Klup77 en Kefee de Baek) zulle de winnende veer Jocusleedjes live waere oétgeveurd. Tösse ‘t Dominicanenplein en Flujasplein is euveral waat te belaeve mit optraejes van de Hofkapel, de Golden Hiering, Flabbedeius, de winnende Jocus leedjes, de Herfshane, Floep, de Nachravers, Jocus’Dansgarde, Schots en Scheif en mier!

Jocus is mit de iërste editie Boerezôndaag ein samewerking aangegaon mit de 10de editie van de Vastelaovesmert, georganiseerd door Venlo Partners. Nao efkes gén mert te kinne halde door corona wuurt d’r noow groët oétgepak mit haos 40 mertkräöm mit vastelaovesgrei van allerhande soort op ‘t Flujasplein én ‘t Dominicanenplein. Dink aan schoëne toeie, joeksige pekskes en artikele veur de letste schmienk. Maar auk vastelaovesbukskes, dekoratie en neteurlik D’n Opstaeker zien te verkriége.

Naeve de resepsie, live meziék en de vastelaovesmert, zal auk ’t Jocus Museum zien deure aope stelle veur idderein. Aafgelaupe waeke is ‘t museum heraöpend mit eur nieje tentoënstelling ‘Sjiengele Boem!’. Tiédes Boerezôndaag is de entree van ’t Jocus Museum gans gratis.

Boerezôndaag en de Vastelaovesmert zien gratis toegankelik en te bezeuke wies 17.00 oor. In de deilnemende kefees geit ‘t feest daonao vanzelfspraekend wiejer.