De Träöt bringk dit jaor de Vastelaovend thoés
De vastelaovend wuurt dit jaor ingetaoge thoés gevierd. Jocus haet de kômmende waeke nog eine gas verrassinge in petto. Mit De Träöt bringe weej dit jaor de Vastelaovend beej ôg thoés. Taeves is ’t Staatsorgaan van Jocus dit jaor – einmaolig – éin waek ierder te kriége as gebroékelik. Ein kleurrieke oétgave van 92 pagina’s mit foto’s, aevel auk ein aantal boeiende interviews.
Mat van Rhee en Maarten Bastiaens ginge in gesprek mit ein aantal optochdeilnemers en besproke wie zeej ’t ervare um dit jaor gen pekske of wage te make. Auk kiéke zeej veuroét nao de Vastelaovend 2022. In september had Jocus ’t ideej gelanceerd um op gepasde wies same mit de zustervereiniginge in de wiéke de vastelaovend vorm te gaeve. Ein plan det klamp eine maond later spiétig genôg woort aafgeblaoze. Um de verbinding mit de betrokke vereiniginge te halde, haet haos iddere wiekvastelaovesvereiniging ein beejdrage in De Träöt geschreve.
Columniste wie Peter Leijsten, Lucas Bremmers en andere laote eur leech schiene op de vastelaovend dae geit kômme, terwiel ‘t Jocus Museum stil steit beej de jaore det Venlo genne vastelaovend vierde.
De Träöt is noow al te bestelle via www.jocus.nl/webshop, middels een speciale actie: geplaatse bestellinge oét stadsdeil Venlo tot en mit zondaag 31 jannewari waere door de leeje van Jocus gratis thoés gebrach. Spooj ôg nao de webshop.
De Träöt kos slecht €3 en leet vanaaf dinsdaag naomiddaag 26 jannewari in dees winkels:
– Albert Heijn Maagdenbergplein, Maagdenbergplein
– Albert Heijn Hagerhof, Van Nijvenheimstraot
– Bookhandel Koops (via www.boekhandelkoops.nl)
– Jumbo Supermarkt, Vinckenhofstraot
– Jumbo Benders, Gelreplein
– Primera MaasBLVD, Maasstraot
– Gifts Bizz, VieCuri Venlo
– Slegterie De Karbinder, Wolweverstraot
Op dees verkauppunt is auk gratis de Vastelaovesposter 2021 van Jocus aaf te haole. De poster is ontworpe door Anne Haeyen.
Leeje, sponsore en donateurs kriég De Träöt wie vertrouwd thoés bezörg.