Naopraote

Op zôndaag 21 jannewarie vindt in de Maaspaort ‘t jäörlikse ‘Naopraote’ plaats.  Dit gratis evenement is tradisiegetrouw daags nao ‘t Boéremoosbal. Van oorsprông bedoeld ‘m nog efkes nao te wazele euver d’n aovend daoveur, maar inmiddels oétgegreujd tot ein middaag vol mit meziek zang en dans. “Idderein is welkom”, zaet Vors Harry Pouwels. “ ‘t Naopraote is ein van de vuule kwalitatief hoëgstaonde evenemente in de gemeinte Venlo die vreej toegankelik zien en waoveur d’n Opstaeker as passe partout wuurt beschouwd. De jeug ônder de zestien jaor kin oéteraard veur ‘spek en boëne’ mei naor binne.

Auk dit jaor haet de Joekskemmissie van Jocus weer gezörg veur ein fantastisch programma det jôngk en ald zal weite te boeie. Um 14.30 oor äöpent de Hermeniekepèl deze middaag vol allerhand artieste. Hoëgtepunt is ‘t kinnismake mit ‘t Boerebroélofsgezelschap 2007 ‘Joekskepèl De Mootwörm’. Dit gezelschap wuurt veuraafgegaon door “d’n erme tak” van Venlostad.com waat, zoë wilt de tradisie, eur “kiendje” luuët kiéke.

Name as Beppie Kraft en Neet oét Lottum hove amper nog ein introduksie. Dit jaor steit Beppie 50 jaor op ’t podium. Ein vakvrouw dus mit jaorelange ervaring dae steeds weer ‘t publiek wet te rake. Neet oét Lottum van megatalent Frans Pollux tummert auk al weer tien jaor mit eure feesmeziék aan de waeg. Stef Kupers en Annelies Holtmans kômme oét Tegele. Zeej begôste in 1993 mit ‘t schriéve en zinge van vastelaovesleedjes wao zeej o.a. in Tegele, Bliérick, Venlo en Belfeld priéze mei in de wach sleipde.

De Kammerkätzchen (Duits veur kamermaedjes) und Kammerdiener zörge al mier dan 50 jaor veur dansspektakel. ‘t Is de ‘Tanzgruppen’ van ‘der Alten Kölner Karnevalsgesellschaft Schnüsse Tring’.
Vaerder zien op deze middaag maar leefs ach nieje vastelaovesschlagers te huuëre. ‘t Winnende leedje van ‘t ‘Jeugleedjeskônkoer’, gebrach door de kinder van de Greunveldschoël. De winnende leedjes oét Bliérick en Tegele. ‘t Publiek mak kinnis mit ‘t duo Au & Lau, winnaresse van de iërste Bling Bling talentejach van de Herfshane. Netuurlik ôntbraeke de veer nieje Jocusleedjes neet,”Al waat ik dink”, “Wies heej”, de “Vastelaoves-serenade” en ‘t winnende leedje “Olms” van ’t kwartet Stikkelbroeck, Holla en de Breurs Pollux. De prissentasie is in hand van Jack Schatterjé en Ruud Stikkelbroeck. In de Foyer speule Tüünke Liëger en de Prinsekepèl.