Jocusvlagge gruuëts truuk op Sint Martinusbasiliek
Maondaag 3 fibberwari 2020
Op zaoterdaag 8 fibberwari zal d’n tore van de Venlose Sint Martinusbasiliek opniej veurzeen waere van vlaggemaste, wao-aan gruuëts de Jocusvlagge zulle wappere tiédes de regeerperiode van de nieje Stadsprins.
Dees actie is in euverleg aafgestump mit ’t Instituut Voor Natuureducatie (IVN) Maasduinen, ein organisasie die zich onder miër inzet veur ’t belang van de in d’n tore residerende slechtvalk.
Veurig jaor, in ’t jubeljaor Jocus 16×11, woort de Jocusvlag veur ’t iërs gehese, aevel nao twië daag alweer gestreke vanwaege ’t risico op verstore van ’t nestel- en broedproces van de slechtvalk.
Dit jaor zal Jocus zich beperke tot ’t aanbringe van dreej vlaggemaste in plaats van veer. De kant mit de invleegäöpening veur de slechtvalke vreej zal bliéve.
Mit dees aanpassing haet IVN Maasduinen te kinne gegaeve det zeej gen inkel bezwaor hebbe taege dees veurgenaome actie waobeej baove-oét ôzze Sint Martinusbasiliek de Jocuskleure de Venlose binnestad twië waeke lang zulle siere.