Jocus-haan respecteert slechtvalk

Zaoterdaag 23 fibberwari woord um 12.00 oor ein carillonconcert georganiseerd door Venloosch Vastelaoves Gezelschap Jocus en Showorkest Harmonie Fortissimo beej gelaegenheid van ‘t 16 x 11 jubileum van Jocus. Daobeej woord de tore van de Sint Martinusbasiliek versierd mit veer Jocusvlagge.

In verband mit ’t aangekôndig breujdproces van de slechvalk in d’n tore van de Sint Martinusbasiliek in Venlo zulle de jocusvlagge aan d’n tore vandaag waere gestreke. In samespraok mit ‘t bestuur van IVN Maasduinen haet Jocus heejtoe beslaote. De organisatie veur natuureducatie reageerde positief op dit besloét en goof aan dat ‘t in de toekoms gen probleem is um de tore te versiere mit vlagge as det boéte ‘t breujdseizoen is van deze einzigartige vogelesaort.

“Natuurlik zoel ‘t moei zien as de vlagge tiedes de vastelaovesdaag de stad zoele versiere vanaaf de Martinustore, maar weej respectere deze bizondere vogelesaort, det sprik vanzelf. ’t Zoel zund zien as d’n haan ziene vaere naef de slechvalk zoel versteure. Ik haop det ‘t ein vruchbaar en joeksig breujdseizoen wuurt veur de slechtvalke”, alzoë Vors Joeccius XI.

De kômmende jaore velt vastelaovend vruuger in ‘t jaor. De vlagge waere dan weer gehese.