Mit vastelaovend hebbe Jocus en L1, mit hölp van de Venloosche Platekas, de hand inein geslage um alde Jocusleedjes via de meziékstreamingsdeenste beschikbaar te stelle. Via ’t album ‘Venloosche Vastelaovend oét ‘t Jocus en ROZ archief’ waere de archieve van Jocus en L1 geäöpend. Leefs 23 leedjes oét de periode 1948 – 1961 zien in zien meis originele vorm te huure. ’t Album bevat auk ein aantal live opnames oét ’t R.O.Z. archief det door L1 beschikbaar is gesteld.

Krakende live oétveuringe wie D’n Alde Kleierkas (1948), Vastelaovend in Venlo (1949) en de Wuiles (1952) laote de Jocuszittinge in de Prins van Oranje weer tot laeve kômme. Prachtige opnames van ‘t Veurjaor (1954), Minsekinder en d’n Hood (1957) laote de jaore fiéftig herlaeve. Zoë zien op de verschillende opnames onder andere Sjraar en Piet Peetjens, Felix Peters, Nel de Wolf, Frans Boermans en Funs van Grinsven te huure.

Mit ’t deile van deze meziék wille Jocus en L1 dit meziékale költurele erfgood veur de kômmende generaties beschikbaar te stelle. De Venloosche Platekas haet geholpe um de opnames op te spaore en te digitalisere. Eure zeuktoch haet al geleid tot miër ôntdekkinge die ’t kômmend jaor verschiéne.

Daonaeve zien in ’t Jocus Archief speciale opnames van Heimwië nao Venlo (1952) en Pingalia (1953) nao baove gekômme. Van dees verlaore gewaande leedjes woorte in 2007 al ein live versie door Jocus opgenaome  mit zang van Sjraar Peetjens en Nic Lebesque. Via dit album kômme dees leedjes noow auk online beschikbaar.

Mit de letsgeneumde leedjes wilt de Venloosche Platekas mit Jocus auk ein ander doel vervölle:

ongeviër 15 leedjes zien noëits opgenaome of is ’t geluud verlaore gegaon. Op d’n achtergrond wuurt gewerk aan um auk dees leedjes op termien oét te bringe zoëdet de leedjesschat van Jocus volledig beschikbaar kump.

‘ t Live album ‘Venloosche Vastelaovend oét ‘t Jocus en ROZ archief’ is vanaaf vandaag te beluuste de online streamingsdeenste zoëas Spotify en Apple Music.