Mit vereinde krachte is de letste waeke ein schat aan Venlose vastelaovesleedjes beschikbaar gemak via de online luusterdeenste wie Spotify en iTunes. Vuuël leedjes leeke haos vergaete, aevel door ein samewerking tösse Jocus en de Venloosche Platekas zien zeej noow veur idderein te beluustere. De originele versie’s van haos 130 leedjes wie Kiék ze kiéke, Ik bin zoë einzaam, Sahara en Och Marleen oét de jaore zestig en zevetig. Maar auk Minse wie weej, de Wiets van de fiets, Veur altiéd eine Venlonaer en Josefien oét de jaore tachtig en later. En ‘t ind is nog lang neet in zich.

Roel Bisschops is as veurzitter van Jocus’ Joeks kemissie gruuëts: “De Jocusplate die zien opgenaome beej Jan Theelen ware al te beluustere, netwie de Jocus albums van de aafgelaupe jaore. Maar ruum twië-derde ontbrook nog. As Jocus vonde weej ‘t belangriék det weej de Venlose vastelaovesleedjes doorgaeve via de mederne kenale. Daorum zien weej bliej det weej in samewerking mit de Venloosche Platekas noow al die leedjes truuk kinne bringe. ‘t Is geweldig um al die alde leedjes weer te huure en haopelik wuurt det ein inspiratiebron veur de kômmende jaore.”

Miër as 30 jaor aan Venlose vastelaovesleedjes zien noow online te beluustere. In einen tiéd wao de cd-speuler oét de hoéskamer verdwient dreigde ein deil van de Venlose vastelaovesleedjes in de vergaetelheid te rake. Idderein kint weer meizinge mit de Jocus Hofzengers Sjraar en Piet Peetjens en Felix Peters, maar auk Hannelore Winter, Wiel Vestjens en Hay Crompvoets, Joke Theeuwen, Claar Boots, Bert en Herm Pollux en nog miër artieste. ‘t Origineel van Zing nog ens, Joetse Jatse, en LVK-winnaer Had ik maar: idderein kin ze noow weer huure. En waat dach geej van Zutjes aan, Jocus Vitae en Veur altiéd eine Venlonaer? Van singeltjes, LP’s, kesettebendjes tot cd’s: alle registers zien aopegetrokke um dees Jocusleedjes weer te laote huure.

En mit succes. Names de Venloosche Platekas is initiatiefnemer Fred Honig bliej: “Venlo haet zô’n schat aan vastelaovesleedjes, dao zien ganse generaties groët mei gewaore. De jongere luuj kinne waal ein aantal aldere leedjes as cover, maar ‘t origineel haet toch zien eige geluud. Ein uniek geluud oét verschillende tiédsperiodes. En det dreigde te verdwiéne. ‘t Vastelaovesgeluud oét viéf, zes decennia is noow weer te huure. En d’r kump nog vuuël miër. D’r is ôs zoëvuuël meziék aangebaoje, van plate wies live opnames, det weej de kômmende tiéd veuroét kinne.”

De aldste opname die noow te huure is van Sjiengele Boem. ’t Leedje oét 1950 kint iddere Venlonaer, groët of klein, van boéte. ’t Jocus Museum ôndekde recent det dees opname aafkomstig is oét de Jubelzitting Jocus 10×11 op zondaag 16 november 1952 in ’t Concertgeouw Prins van Oranje. Mit dees unieke live versie van Felix Peeters kump beej idderein ‘t waore vastelaovesgeveul nao baove. Det geldt auk veur ‘t krakende geluud van de singeltjes oét de jaore zestig. Nao de vastelaovend geit de aandach de periode veur 1962 mit onder andere eine aantal niej ôntvange live opnames. Maar auk andere plaate zien aangebaoje um veur de kômmende generatie’s door te gaeve.

Maar iërs wuurt ‘t noow vastelaovend!
Daorum is de Venlose vastelaovesmeziék vanaaf noow veur idderein te beluustere via bekinde online streamingsdeenste Spotify en op iTunes.