27 inschriévinge Jocus Veurselectie
Zondaag 26 juli 2020
27 leedjes zien ingeschreve veur de Veurselectie van Jocus Leedjesaovend. Det zien d’r percies aevevuul as ‘t veurig jaor. Op de Veurselectie op zaoterdaag 29 augustus waere de 11 finaliste van Jocus Leedjesaovend gekaoze.
Jocusveurzitter Roel Versleijen is kontent mit zoëvuuël inschriévinge: “In dees vraemde tieje hebbe de teksschriévers, kômponiste, zengers en zangeresse neet stilgezaete. Juus noow is ‘t verlange nao de vastelaovend groët en bringk det kreativiteit nao baove. De vastelaovend van 2021 geit door. In welke vorm dan auk. Juus dan zien ôs vastelaovesleedjes ein bindmiddel um de bliejheid en joeksigheid truuk te bringe. ‘t Zal ein hiéle kluif waere um 11 leedjes oét te keeze.”
Op de Veurselectie zal de vakzjurie de leedjes beoordeile en 11 finaliste veur de Leedjesaovend keeze. Dit jaor verwelkômme weej naeve ‘nne haup vertrouwde name auk 10 nieje zengers. Schrievers van vruuger jaore laote weer ens van zich huure en tösse de deilnemers zitte ein aantal verrassende kombinasies.
Opus Jocus Leedjesaovend vindt plaats op zaoterdaag 3 oktober. Wie dae aovend d’r oét geit zeen, huurt geej in de kômmende waeke.