Adjudant Sef Smeets
Adjudant II Sef Smeets is 37 jaor en woënt same mit vriendin Jeanine.
As jong oét de binnestad en kleinzoon van ald-Prins Jan III oét 1966 ging hae naor de Martinusschoël.
Nao ziene schoëltiéd volgde ein carriére in de Venlose horeca. In 2016 woort hae door beste vrind en Hoëgheid Gijs gevraog as operationeel manager beej ‘t Theaterhotel. Same hebbe zeej gewerk aan ’t kônsep en realisatie van Mr. Jigs. Auk same woort ’t nieje oétdagende projek aangegaon mit ‘t Ald Weishoés. As meide eigenaer/directeur van ’t hotel en de horeca is hae sinds de äöpening in november dao dageliks te vinde. Same mit d’n Hoëgheid haop hae det ‘t Ald Weishoés weer ein laevendig middelpunt in hertje stad geit waere en vuuël vereiniginge dao eure waeg alweer gevonde hebbe of nog gaon vinde. Auk Jocus Toekôms is truukgekiërd op ‘t alde nes!
Naeve det kaoke zien beroep is, is det auk nog steeds ein hobby. Regelmaotig kaok hae veur vrinde en bekinde allerhande kulinaere hoëgstandjes. ‘t Bourgondische laeve en geneete is eine gemeinschappelik band mit d’n Hoëgheid en vrind Gijs en collega-Adjudant Martijn
Sportief waas hae actief beej de Venlose Hockey Club. Beej dees oer-Venlose vereiniging waas hae Broédegom mit Boerebroélof in 2016. Vastelaovend woort um mit de paplaepel ingegaeve. As kleine blaag trok hae mit zien elders mei in d’n optoch mit de bekinde Sôkkerkäörkes. Beej dees klup waare kinderwages verbaoje. Dus as kleine hens meus die ganse route gelaupe waere. Iets waat hae wies noow nog steeds duit.
“ ’t Leuke van de Sokkerkäörkes is det weej idder jaor waat bedinke wao weej ‘t publiek interactief beej kinne betrekke. Dèt mak ‘t plezeer veur de toeschouwers en veur ôs nog groëter. As kind al laefde weej thoës en mit vrinde toe nao de Vastelaovend. De veurpret mit ‘t bedinke van ein optochideej en kleier make. Twië jaor hebbe weej det môtte misse. De kroegetoch mit mien vrinde op de vriëdaag d’n optoch op maondaag, de Boerebroélof op dinsdaag – veur de deur van ‘t Theaterhotel veur idderein dae dao zin in haet lekker kerboét bakke. Maar dit jaor haole weej alles in!”
“Vanaaf ‘t moment det ik jao heb gezag bin ik gaon geneete. ‘t Spel en ‘t mysterie rondum ein Dreejspan. De gezellige tiéd en ’t stiekum doon. Ik spits mich noow extra op de vastelaovend dae ik op ein totaal andere en hiel biézôndere wiés meug gaon belaeve. Same mit de Venlonaere ‘t fees viere. Neet op aafstand: maar same op die kis houwe! Same joetse en idderein ontmoete en mit ôg plezeer make”.
