28 inzendinge Jocus Veurselectie 2022

Zondaag 31 juli 2022

Zaoterdaagnach 23 juli sloot de inzending veur Jocus Veurselectie. Maar leefs 28 leedjes woorte ingesteurd. Roel Bisschops, veurzitter van Jocus Joekskemissie is tevreeje en kiék oét nao de kômmende editie: “Weej zien gruuëts op ‘t aantal inzendinge. De kins zegge det de spontane vastelaovend van ‘t aafgelaupe jaor weer veur vuuël inspiratie haet gezörg. Auk dit jaor hebbe zich weer ein aantal nieje deilnemers ingeschreve en meuge weej auk vuuël ervare zengers, zangeresse, schriévers en kômponiste verwachte.”

Jocus Veurselectie wuurt gehalde op zaoterdaag 3 september. De deilnemers waoge eur kanse op ‘t groëte podium van Opus Jocus Leedjesaovend. Volges Bisschops wuurt auk de Leedjesaovend einen aovend um nao oét te kiéke: “Auk dit jaor vindt Jocus Leedjesaovend plaats in dezelfde sfeer as ‘t veurig jaor. De steul en taofels zulle ein hoéskamergeveul gaeve terwiél de sfeer op de buun op verrassende wiés op de minse aaf zal kômme. Miër dao-euver ônthölle weej in de kômmende tiéd.”

Jocus Veurselectie wuurt gehalde op zaoterdaag 3 september en is beslaote veur de deilnmers. De 11 beste leedjes meuge door nao Opus Jocus Leedjesaovend. Deze wuurt gehalde op zaoterdaag 8 oktoëber in Theater de Maaspoort.