Finaliste Opus Jocus Leedjesaovend 2019 bekind

Op zaoterdaag 24 augustus vond in de Venlonazaal de Veurseleksie plaats. Oét de zeve-entwintig inzendinge woorte door de Vakzjurie de 11 finaliste veur Opus Jocus Leedjesaovend 2019 gekaoze.

Roel Bisschops, veurzitter van Jocus’ Joeks kemmissie: “Boéte waas ‘t zomers werm, binne klonk al ein bietje de vastelaovend. De vakzjurie had eine lastige aovend. Onder de finaliste zitte diverse verrassende leedjes. Ein niej vastelaovesgeluud, asauk ‘t traditionele Venlose vastelaovesleed; ‘t zal op de Leedjesaovend te huure zien. Zoëwaal nieje schriévers en zengers, asauk zengers en schriévers van vruuger jaore die al inkele jaore neet miër op Jocusbuun hebbe gestaon. Det is ein bewiés wie breid ‘t Venloos vastelaovesleed verankerd is. De finaliste zette mit eur nieje leedjes alves d’n iërste stempel op de vastelaovend van ‘t kômmend jaor.”

Opus Jocus Leedjesaovend 2019 vindt plaats op zaoterdaag 28 september in Theater de Maaspoort in Venlo. Tiédes Opus Jocus Leedjesaovend strieje elf leedjes um “de Funs”. In ein aovendvollend program zien naeve de finaliste, auk optraejes van onder andere Greun Graas, Jocus Hofkepél en Tekiela.

Intreekaarte á €19,50 zien vanaaf noow verkriégbaar beej Jumbo Benders Venlo en via Jocus’ webshop: www.jocus.nl/webshop/toegangskaarte.