Anne Haeyen mak winnend ontwerp Vastelaovesposter 2021

Donderdaag 14 jannewari 2021

Op donderdaag 14 jannewari woort in ‘t Jocus Museum ‘t winnende ôntwerp veur de Vastelaovesposter 2021 bekind gemak. Via de Facebook- en Instagrampagina van Jocus kos idderein zien stum oétbringe. Waat het: geej stumde massaal. In maar dreej-enhalve daag woorte ruum 2600 stumme oétgebrach op ein van de viéf ontwerpe. In totaal moch Jocus twintig inzendige ôntvange.

‘t Winnende ontwerp is gemak door Anne Haeyen. Ein ech Venloos maedje, taegewaordig vanoét ‘t riék van de Piëlhaas aktief as baeldend kunstenaer. Op de poster is ein knoévelend kloonspaar te zeen. Jocus P&P veurzitter Roy Dambacher snap waal waorum minse zoëvuuël veur dit ontwerp hebbe gestump: “Asse dit ontwerp bekiéks straolt deze poster einen haup wermte oét. Hae rup ein geveul op wao minse zich juus in dezen tiéd in herkinne en nao verlange deze vastelaovend. Ik dink det vuuël Venlonaere en minse daoboéte stil zulle staon beej vastelaovend door det op eur eige wies in hoéselik kringk mit ‘t gezin te viere. Want wie danauk ‘t wuurt 14 fibberwari vastelaovend. Haopelik hange minse deze poster massaal veur de raam um zoë toch ein bietje de vastelaovend in hoés te haole.”

Bekiék auk de ripportage mit interviews op Omroep Venlo:
https://omroepvenlo.nl/nieuws/artikel/jocus-presenteert-vastelaovesposter 

De vastelaovesposter is vanaaf dinsdaagmiddaag 26 jannewari gratis verkriégbaar via de verkauppunte van De Träöt. Op dae’n daag verschient auk De Träöt. Speciaal in dit jaor verschient ‘t Staatsorgaan, einmaolig, ein waek iërder as idderein gewind is.

De aafhaolpunte zien Albert Heijn Maagdenbergplein, Albert Heijn Hagerhof – Van Nijvenheimstraot, Jumbo Supermarkt – Vinckenhofstraot, Jumbo Benders – Gelreplein, Primera MaasBLVD – Maasstraot en Slegterie De Karbinder – Wolweverstraot.