Vastelaovend Same! nieje tentoënstelling Jocus Museum

Maondaag 16 september 2019
‘t Jocus Museum äöpent zien veerde tentoënstelling sinds de äöpening. Vastelaovend Same! Ein volksfees um gruuëts op te zien is vanaaf noow te bekiéke. De aafgeloupe maonde is ‘t Jocus Museum gans verniejd. Neet allein is ‘t museum volledig opniej ingerich mit nieje expositie-kes en de daobeej huuërende verleechting. Taeves mochte diverse nieje kollectiestôkke verwelkômp waere.

Ein originele dokterskoets oét de 19e ieuw, eigendom van Jocus, is ein van de prônkstökke. In ‘t auditorium dreijt ein unieke documentaire euver de Venlose Boerebroélof. Middels ein foto-expositie wuurt in verschillende tiédsbeelde de Groëten Optoch geprissenteerd. Parel in de kroën is “de Schellenbaum” van Jocus. ‘t Vereinigingsteiken van Jocus, gemak en ingesteld beej gelaegenheid van de inhöldiging van Keuningin Juliana in 1948, is normaal allein in gebroék beej de Groëte Prônkzitting.

In Vastelaovend Same! wilt ‘t JocusMuseum veural de vuuëlzijdigheid van de diverse vastelaovestradities laote zeen: ein volksfees van idderein en veur idderein, det door de vastelaovesvierders zelf wuurt gemak. “Sinds de äöpening van ‘t Jocus Museum zien weej verras mit ein enorme belangstelling. Opvallend waas wievuuël groepe zich hebbe aangemeld veur ein rondleiding op afspraok”, aldus veurzitter Renier Linders. “Det guuëf aan wie groët de interesse is in de historie van Venlo en wie deep ‘t vastelaovesgeveul in de samenlaeving verankerd zit. Mit de vers-geäöpende tentoënstelling perbere weej veural te laote zeen wievuuël minse al decennia langk betrokke zien beej de vastelaovend: ôzze vastelaovend is ein volksfees wao idderein zelf zien beejdraag levert.”

Dit naojaor is ‘t Jocus Museum iddere iërste zôndaag van de maond geäöpend van 13.00 wies 16.30 oor.
Daonaeve is ‘t meugelik um mit ein gezelschap op aafspraok te waere rondgeleid in ôs museum.

Miër informatie: www.jocus.nl/museum