Op maondaag 13 fibberwari waas de Stadscarnavalsvereiniging De Tempeleers oét Mestreech op bezeuk beej Venloosch Vastelaoves Gezelschap Jocus in Venlo. ‘t Bezeuk waas ‘t vervolg van ein bezeuk van Jocus aan de Tempeleers in Mestreech in 2020.

Vors Joeccius XI Roel Versleijen en Stadprins Gijs I mit zien Adjudante Martijn en Sef goove De Tempeleers ein werm welkom in ‘t Stedje van Lol en Plezeer.

De Stadsprinse Stefan I oét Mestreech en Prins Gijs I van Venlo schödde mekaar de hand en wisselde neteurlik eur ervaringe en hoésordes oét. ‘t Gezelschap van de Tempeleers woort versterk door börgemeisters Annemarie Penn-te Strake en Antoin Scholten en de Tempeleer President Bastiaan Klomp. De twië staeje Venlo en Mestreech zien al iëuwe door Mooder Maas mit ein verbônde. Neteurlik kump dees verbôndenheid auk in de Vastelaovestiéd tot uuting. Zoë-auk tiédes dit bezeuk.

Nao ein oétgebreid welkom mit lunch in ‘t Ald Weishoés woort ‘t gezelschap door börgemeister Antoin Scholten ôntvange op ‘t Stadhoés van Venlo. Ein gruuëtse groepsfoto moch as bewiés neteurlik neet ôntbraeke. 

Daonao woorte de Tempeleers ôntvange in ‘t Jocus Museum alwao zeej door Museumveurzitter Renier Linders en ein aantal Museumgidse woorte ingewied in de riéke historie van de Venlose vastelaovend. In ‘t Jocus Museum prônk ein prachtige foto as bewiés van de verbôndenheid van dees twië vereiniginge: in 1899 ging Jocus op bezeuk in Mestreech. 

‘t Bezeuk vandaag waas ‘t logische vervolg dao-op en woort ein ziër plezerige beejeinkôms wao stil woort gestaon beej de tradities en beteikenis die ‘t volksfees in beide staejer haet. En neteurlik op welke wies det beide vereiniginge mekaar kinne inspirere um de vastelaovend de kômmende jaore kinne doorgaeve en laote bleuje.

Laeve de Vastelaovend van Mestreech en Venlo!
Vastelaovend Same!