Mustangs organisere Boérebroélof 2007-2008

Tiédes de maondelikse Raodsvergadering van V.V.G. Jocus is door ‘t bestuur van de vereiniging gisteraovend unaniem beslaote det de Honk- en Softbalclub Venlo (H.S.C.V. Mustangs) ‘t aanstaonde vastelaovesseizoen de iër wuurt gegund um de Boérebroélof 2007-2008 te organisere.  De Mustangs viere in 2008 eur 40-jäörig jubileum en wille deze verjäördaag onder de aandach bringe van ‘t groëte Venlose publiek door samen mit eur ‘n unieke en sprankelende boérebroélof op te tuien.

‘t Gezelschap reageerde gisteraovend laaiend enthousias op dezen oétslaag. De kômmende maonde gaon ze drök aan de slaag um dit groëtse Venlose fees vorm te gaeve: “Werk aan de winkel”, aldus ein van de Mustangs.

Tradisiegetrouw wuurt de keus veur ‘t iërstvolgende Boérebroélofsgezelschap in april door Jocus bekindgemak.