Toch nog eine nieje Jocus Prins
In dit biezôndere vastelaovesjaor kint Venloosch Vastelaoves Gezelschap Jocus toch eine niejen Hoëgheid bekindmake. Al zulle d’r dit jaor gen georganiseerde Jocusactiviteite plaats vinde en zal d’r gen niej Jocus Dreejspan 2022 waere oétgerope, toch meug d’r eine niejen Hoëgheid aan de Prinsegalerie waere toegevoog…
Veur de nieje editie van De Träöt heel ‘t Jocus Museum in samewerking mit ‘t Jocus Archief ein onderzeuk nao de Venlose vastelaovend in de 19e iëuw. Renier Linders, veurzitter van ’t Jocus Museum: “ ’t Is Biezonder det weej op dees wiés de historie tot laeve kinne bringe. Dees periode is belangriék gewaes veur Jocus en de vastelaovend in Venlo. Mit de digitale meugelikhede van noow kinse steeds miër informasie samebringe en ein gebeurtenis inkleure. En tot ôs groëte verrassing wuurt de galerie van ald Prinse auk nog ens oétgebreid.
Want al snel neemp ‘t onderzeuk ein opmerkelikke wending. De vastelaovend van 1898 haet ein prominente plaats in de Jocushistorie. Aevel vuuël is euver dae’n tiéd neet bekind. Via ‘t gedigitaliseerde Jocus Archief en de Keuninklikke Bibliotheek in Den Haag woort informasie ôntdek det zelfs inkele historische ôntdekkinge opleverde.
Jaap Stroeken, haufredacteur van De Träöt leech einen tip van de sluier op: “Idder jaor haet De Träöt auk aandach veur ein historische gebeurtenis. Dit jaor waas ôs ideej um truuk te gaon nao de 19e iëuw, nao ‘t jaor 1898 wie in Venlo op groëtste wiés vastelaovend woort gevierd. Jocus bestônd det sezoen 5×11 jaor en aan de hand van inkele unieke foto’s woele weej as ‘t waore ein stadswandeling door ‘t Venlo van dae’n tiéd make.”
Ein deil van ‘t vereinigingsarchief is in broékliën beej ‘t Gemeintearchief en bevat inkele foto’s die nog neet dök gepubliceerd zien. Same mit krantepublicaties oét dae’n tiéd is ein chronologisch verslaag gemak. Tot groëte verrassing duik ein artikel op oét de Limburger Koerier van 11 fibberwari 1898: “de kleurrijke opgetuigde Venetiaansche gondel waarin Prins Carnaval, de heer Paul Thywissen, en Venlona, de heer Ger. Engels, benevens de leden van het Jocus-comité in matrozenkostuum plaats zullen nemen (…) zal niet nalaten een overweldigend effect te maken.”
Jaap Stroeken: “Zoë kwaam tiédes ’t onderzeuk d’n Hoëgheid van det jaor baove: Paul Thywissen (oétgespraoke as Tie-wissen) ging Venlo veur as Prins Paul I. Eigelik beej toeval, maar toen woele weej neteurlik miër weite. Veur Jocus waas deze naam auk ônbekind. Weej wiste waal det hae as Marquis van Stempelnowski lid van de Raod van Elf waas. Taegeswaordigs is de niejen Hoëgheid haos ein staatsgeheim, aevel toen stond hae gewoën in de krant. In ’t Träöt-artikel gaon weej wiejer opzeuk nao zien roots en waere andere leuke ônthöllinge euver vastelaovend 1898 ônthöld.”
Renier Linders vertelt: “Det doon weej auk in ’t Jocus Museum neteurlik. D’r löp al de tentoënstelling ‘Waas geteikend’ ein hommage aan ôzze Hofteikenaer Piet Camps. Dao is noow ein mini exposisie aan toegevoog wao-in weej dit verhaol en de niejen Hoëgheid oét de deuk kinne doon. Wies vastelaovend zien weej iddere zondaag geäöpend en neteurlik is ’t auk meugelik um ein rondleiding op aafspraok te kriége.”
‘t Volledige verhaol euver de vastelaovend 1898 wuurt gepubliceerd in de nieje editie van De Träöt en is vanaaf donderdaag 10 fibberwari verkriégbaar op de bekinde verkauppunte en www.jocus.nl.
Euver ’t Jocus Museum:
Wiés vastelaovend is ‘t Jocus Museum iddere zondaag geäöpend van 13.00 oor wies 16.30 oor. Auk is ’t meugelik um op aafspraok ’t museum te bezeuke en ein rondleiding te kriége. Miër informasie, auk euver de geldende maotregele: www.jocus.nl/museum