De Prins van Jocus zal vanaaf dit jaor op ein ander moment aaftraeje: neet miër wie det d’n broék waas op de Groëte Prônkzitting in november, aevel vanaaf dit jaor op de dinsdaag van de Vastelaovend.

‘t Besloét is genaome naodet binne de Raod van Elf van Jocus ‘t geveul laefde det ‘t huidige verhaol onlogisch veulde. “Weej hebbe ‘t besloét alleriërs bespraoke mit verschillende Dreejspanne oét ‘t verleeje. Ein aantal dao van goof aan det ‘t toch waal vraemp is um op Elf van Elf weer in vol ornaat te verschiéne, zeker naodet op Vastelaovesdinsdaag de muts al is aafgezatte”, aldus Vors Joeccius XI en taeves veurzitter Roel Versleijen.

De alde situatie, waobeej de Prins op de Groëte Prônkzitting in november abdiceerde, makde det ‘t verhaol van de Venlose Vastelaovend ‘vraemd’ inein stook. “ ’t Veulde onlogisch”, aldus Versleijen. “Weej viere de Vastelaovend in de Riénlandse traditie en hebbe ‘t in groëte liéne ingerich nao ’t veurbeeld oét Kölle. Dao zuu-se nao vastelaovesdinsdaag ‘t Dreigestirn auk neet miër.”

De keuze um ‘t moment van aaftraeje te verplaatse nao ‘t Mutsaafzette op vastelaovesdinsdaag middernach, veult veur de Raod van Elf van Jocus dan auk hiél logisch. “Det duit allich ‘t meis rech aan ôs theaterstök. ‘t Inmiddels traditionele Mutsaafzette is ein oétgelaeze moment daoveur. Weej kinne dan ‘t aaftraeje van ‘t Dreejspan deile mit de doézende Venlonaere die zich um middernach verzameld hebbe veur ‘t Stadhoés.”

Wie de abdicatie d’r kômmende 21 fibberwari in detail oét kump te zeen, wilt hae nog neet verraoje, aevel ‘t belaof ein spektakelstök te waere, aldus de Vors. “Vanaaf noow zal op vastelaovesdinsdaag um klokslaag 00.00 oor de Stadsprins abdiceere.”