Jocus schuut wagebouwers te hölp beej nieje optochregels

Nieje en stringere regels veur groëte wages die meitrekke in d’n optoch kinne veur wagebouwers veur de nuuëdige haufbraekens zörge. Um vreejwilligers zoëvuul meugelik te ôntlaste wil ‘t Venloos Vastelaoves Gezelschap Jocus bouwers zoëvuuël meugelik ôndersteuning beeje. ‘Wagebouwers môtte zich kinne kônsentraere op fraaie kreasies en neet wakker hoove te ligge euver regelgaeving’, zaet Rudi Vertel, veurzitter van de Technische Kemmissie van Jocus.

De nieje regels schriéve ônder andere veur det optochwages verzekerd môtte zien, gekeurd môtte waere en nog maar maximaal 20 persoëne meuge verveure. Det zien allemaol veurschrifte die ‘t bouwe van groëte wages neet medein mekkeliker make. Daorum haet ‘t besteur van Jocus beslaote wagebouwers te helpe. ‘t Geit um ‘t gaeve van advies of hölp beej ‘t aafsloéte van ein verzekering. En Jocus haet geld gerisserveerd um finansjeel beej te springe beej ‘t aafsloéte van eine verzekeringspolis. ‘Wagebouwers die in de Venlose optoch op vastelaovesmaondag meilaupe en hölp nuuëdig hebbe, kinne dus beej ôs aankloppe’, zaet Viertel. ‘Umdet weej as Jocus gaer einen optoch mit groëte fraaie wages wille behalde en weej de tradisie van ‘t bouwe van wages in stand wille halde.’

De Groëten Optoch trek dit jaor op maondaag 3 miërt door de Venlose binnestad. Aanmelde veur d’n optoch en vraoge stelle euver hölp beej de nieje regels veur vastelaoveswages kin tiédes ein van de Praotaovende. Dees waere gehalde op 14 jannewari, 21 jannewari, 28 jannewari en 4 fibberwari um 20.00 oor beej Kefee De Brasserie.