Jocus Museum verwach 800e bezeuker jubeltentoënstelling

Op de letste äöpeningsdaag veur de vastelaovend verwach ‘t Jocus Museum ziene 800e bezeuker te verwelkômme veur de Jocus jubeltenstoënstelling “Dit is Venloos Roem”. De 800e bezeuker zal verwelkômp waere mit ein ludiek vastelaovespakket.

In de jubeltentoënstelling kint de bezeuker zich begaaje aan prônkstökke euver onder andere de alde Jocus historie, de Groëten Optoch, de Boerebroélof en ‘t Venloos vastelaovesleed. Zoë zien unieke stökke oét ‘t Gemeinte Archief te zeen, wuurt de Koninklijke Erepenning mit de door Keuning Willem Alexander geteikende oorkonde tentoëngesteld en is de gôlde LP van Vastelaovend Same te zeen.

Boéte de vaste äöpeningsdaag haet ‘t Jocus Museum in de aafgelaupe maonde ruum 30 rondleidinge op aafspraok gegaeve. Variërend van vrindegroepe, bedriéve en kellega-vastelaovesvereiniginge; zeej woort allemaol ingewiejd in de riéke historie van de Venlose vastelaovend. ‘t Jocus Museum is vergöld en taegeliékertiéd gruuëts det zo’nnen haup minse ‘t museum haet bezôch.

Nao vastelaovend is ‘t Jocus Museum nog geäöpend op zondaag 15 maart en op zondaag 7- en 21 april. In de zomermaonde zal ‘t Jocus Museum ein kompleet nieje inrichting kriége. Zoë waere ein aantal vitrinekaste vervange door en wuurt ‘t museum veur ‘t nieje vastelaoves-sezoen veur ein hagelnieje tentoénstelling ingerich.

Veur miër informatie euver ‘t Jocus Museum: www.jocus.nl/museum