Niej evenement op 22 jannewari Boerezôndaag

Zondaag 15 jannewari 2023

Daags nao d’n Boeremoosbal vindt in de umgaeving van ‘t Kloësterkwarteer en Domani de iërste editie plaats van d’n Boerezôndaag. Ein gans niej aevenement van Jocus as opvolger van ‘t Krense. Beej dit aevenement steit de resepsie van ‘t Boerebroélofsgezelschap Zomerparkfeest centraal, maar wuurt auk miër dan oëits de verbinding mit vastelaovesminnend Venlo en umstreke gezôch. In samewerking mit de Vastelaovesmert, georganiseerd door VenloPartners, wuurt d’r eine Boerezôndaag neergezatte det zoewaal verniejend wie vertrouwd zal aanveule.

Wie ’t d’n broék is, viert ‘t Boerebroélofsgezelschap, dit jaor ’t Zomerparkfees, eur resepsie op d’n daag nao d’n Boeremoosbal. Na jaore van “Krense” in de Maaspoort wuurt dees resepsie dit jaor in ein niej jeske gestaoke. As niej lokasie is gekaoze veur ‘t intieme Domani. Naeve de zaal binne, zal auk de umgaeving van ’t Kloësterkwarteer mit zien kefees betrokke waere.

Um 11.30 oor wuurt aafgetrap mit ‘t ôntvange van ’t niej Broédspaar mit eur gezelschap ônder muzikale begeleiding van de Hermenie en Jocus Hofkepél. Daonao verplaats ‘t gezelschap zich nao binne um in Domani eur resepsie te halde.

Vanaaf 13.00 oor zal boéte ‘t Boerevastelaovesfees los gaon op en rond ‘t Dominicanenplein; dit is veur iddere vastelaovesvierder vreej toegankelik. Beej de deilnemende kefees (De Klep, De Keizerin, Klup77 en Kefee de Baek) zulle de winnende veer Jocusleedjes live waere oétgeveurd. Taeves zölle diverse joekskepelle ‘t gebied tösse ‘t Dominicanenplein en Flujasplein mit eur klanke te huure zien.

Jocus is mit de iërste editie Boerezôndaag ein samewerking aangegaon mit de 10de editie van de Vastelaovesmert, georganiseerd door Venlo Partners. Nao efkes gén mert te kinne halde door corona wuurt d’r noow groët oétgepak mit haos 40 mertkräöm mit vastelaovesgrei van allerhande soort op ‘t Flujasplein én ‘t Dominicanenplein. Dink aan schoëne toeie, joeksige pekskes en artikele veur de letste schmienk. Maar auk vastelaovesbukskes, dekoratie en neteurlik D’n Opstaeker zien te verkriége.

Naeve de resepsie, live meziék en de vastelaovesmert, zal auk ’t Jocus Museum zien deure aope stelle veur idderein. Aafgelaupe waeke is ‘t museum heraöpend mit eur nieje tentoënstelling ‘Sjiengele Boem!’. Tiédes Boerezôndaag is de entree van ’t Jocus Museum gans gratis.

Boerezôndaag en de Vastelaovesmert zien gratis toegankelik en te bezeuke wies 17.00 oor. In de deilnemende kefees geit ‘t feest daonao vanzelfspraekend wiejer.