In memoriam: Falco Dings

Bedreuf en vol ôngeluif vernoome weej ’t ônverwach haergaon van

d’n hiër Falco Dings

Officeer Zilver in de Orde van d’n Haan
Ald Hoëgheid van Jocus Toekôms in ’t jaor 2012
Ald veurzitter en lid van Jocus Toekôms Pers en Propaganda Kemissie

Falco waas eine ôndernemende en ziër betrôkke Venlonaer. As Jocuslid kinmerkte hae zich door zien groët hert veur de Venlose meziékköltuur. Hae zoot zich gans in ’t biézônder in veur de vastelaovendköltuur ônder jônge minse. Hae waas d’n organisator en initiator van vuuël aktiviteite. Aanjager van De Herfshaneband en doën betrôkke beej Stichting Herfshane. Plaetjesdreijer op tal van Jocus aktiviteite en heilige huuskes in de binnestad.

As lid van Jocus Toekôms P&P Kemissie nog altiéd doën betrôkke beej de vereiniging as kreatieve sparringspartner en bewaker van de Jocus Toekôms költuur. ’t Haergaon van Falco luuët ein groëte laegte achter binne de Jocus femilie.

Jocus zal Falco mit groët respek gedinke en de herinnering aan ziene gölle lach bliévend koestere.
Weej winse Yvon, Paul en Bo hiél vuuël sterkte

Names alle leeje van
Venloosch Vastelaoves Gezelschap Jocus

Roel Versleijen
Veurzitter / Vors Joeccius XI