Nao twië jaor genne (georganiseerde) vastelaovend staon veurluipig alle seine op greun veur ein vastelaovesfees wie weej det veuhaer gewind ware. ‘D’n Opstaeker®’ is in die vraemde jaore waal gebleve en auk veur de kômmende vastelaovend zal weer ein schoën exemplaar verkriégbaar zien, ôntworpe door Peter van ’t Hof oét Aarse. “Det ik op de respectabele laeftiéd van 81 jaor gevraog woort um ‘D’n Opstaeker® 2023’ te ôntwerpe vind ik ein iër”.

Det de vastelaovend twië jaor langk groëtendeils neet gevierd kôs waere ging Van ’t Hof aan ‘t hert. Mit ‘D’n Opstaeker® 2023’ waas hae d’r daorom nao op zeuk um ‘t juuste geveul te kinne waergaeve det huurt beej eine vastelaovend dae intellik weer gevierd meug waere wie ’t zich huurt. Heejbeej kiék hae auk gaer nao ‘t verleeje, gecombineerd mit traditionele vastelaoveskinmerke. “Ik bin begôs mit ein trekpop die al besteit sinds 1700. Nao inkele umzwervinge kwaam ik terech beej de Kloon, ein figuur det ech beej de vastelaovend huurt”.

De trekpop (liéf) en de kloonclown (gezich) zien duudelik te herkinne. Daonaeve guuëf auk de bellon ein extra joeksig tintje aan ‘t ôntwerp. Gedeurende ‘t ganse proces haet Van ’t Hof aldoor det ultieme geveul veur de vastelaovend veur auge gehad onder zien eige motto: “Trek zelf ens dinkbeeldig aan ‘t tuijke, um d’rveur te zörge det ‘t vastelaovesgeveul weer sproedelt en tintelt.”

Peter van ’t Hof (getrouwd mit Dolly, ein echte Aarsese en vader van dreej kinder), is gebaore in Numwaege en haet vanwaege ‘t beroep van zien vader as militair in zien jeugdige jaore gans Nederland gezeen. In totaal haet hae daodoor viertiën verschillende woënplaatse verslete, alveures in 1962 definitief truuk te gaon nao Aarse, wao hae mit zien elders iërder al woënde. Nao suksesvol de Kunsacademie te hebbe doorlaupe is hae werkzaam gewaes beej de V&D in Venlo en beej inkele vekantieparke in Aarse. Daonao is hae veur zichzelf begôs mit ein reclamebureau. In ziene vreejen tiéd waas (en ís!) hae altiéd aktief in ‘t vereinigingslaeve waobeej hae zien kreativiteit de vreeje laup kôs laote gaon as onder andere decorbouwer en ôntwerper. Nog altiéd is hae lid van de lokale vastelaovesvereiniging, al is ‘t ôndertösse waal waat minder actief.

‘D’n Opstaeker® 2023’ is ein broche die steit veur de betrokkenheid mit de Vastelaovend binne de Gemeinte Venlo. Daonaeve guuëf ‘t auk einen bliék van waardering veur de vuuële vreejwilligers die zich inzitte veur de diverse Vastelaovesactiviteite. Mit de verkaup van de broche wuurt d’r taeves eine finansjele impuls gegaeve aan alle vastelaovesveireniginge binnen de gemeinte. ‘D’n Opstaeker® 2023’ wuurt op d’n Elfde van d’n Elfde geprissenteerd. Vanaaf dae datum is hae auk te kaup beej diverse winkels en via de online-kanale van de diverse vastelaovesvereiniginge.