Boerebroélof 2021 gegund aan ‘t Zomerparkfeest
Maondaag 6 april 2020
Op maondaag 6 april haet ‘t bestuur van Venloosch Vastelaoves Gezelschap Jocus bekindgemak det de stichting Zomerparkfeest de iër gegund kriég um de Boerebroélof 2021 te organisere. ‘t Zomerparkfeest neemp daomei ’t stökske euver van de Herungerstraot die dit ’t aafgelaupe sezoen op fantastische wies haet verzörg. Op Vastelaovesdinsdaag wuurt tiédes de Boerebroélof ein Boerebroédspaar op ’t stadhoés in d’n onèch verbônde. Idder jaor wuurt ein andere vereiniging, instelling of bedriéf de iër gegund de organisatie te verzörge. De Venlose Boerebroélof is ein miër as honderd jäörige traditie.
Jocus is zich bewus det weinig Venlonaere op dit moment bezig zien mit de Vastelaovend. D’r zien zörg, kleine en groëte. Want ‘t coronavirus haet auk de stad van lol en plezeer neet ongemeujd gelaote. Daorum veult ’t vraemp um noow al mit de organisatie van dit oer-Venlose feest bezig te zien. “Aevel in de verwachting en haop det auk dees duustere periode veurbeej zal gaon, is ’t belangriék um auk ein zonnig perspectief op de toekôms te halde. ’t Veuroétzich op de Boerebroélof kin de Venlonaren dao haopelik beej helpe”, aldus Jocusveurzitter Roel Versleijen.
Jocus is bliej mit de keus. ‘t Zomerparkfeest is net as de vastelaovend ein oer-Venloos fees det haos gans gedreijd wuurt door betrokke vreejwilligers. Aafgelaupe editie van ‘t Zomerparkfeest ware d’r maar leefs 1.000 vreejwilligers in touw. Ongeviër de helf daovan besteit oét minse van vereiniginge die de hand oét de mouwe staeke achter de bar actief as tapper, inschinker, verkuiper, glazewasser of ophaoler. Dök veer daag aan ein stök. D’r zien auk vreejwilligers die zich juus inzette um ’t fees op te bouwe en zien in de waek veuraafgaond in ’t Julianapark aan de slaag. Daonaeve ontdekse auk minse achter de kassa’s, op de podia, achter de scherme en in de veurbereidende organisatie. Um kort te gaon: einen hiél haop minse die zich vreejwillig wille inzette um dit leuke festival meugelik te make. De vreejwilligers van ‘t Zomerparkfeest zien ein ge-aoliéde einheid, èchte ‘Parcoholics’, die zich dit jaor as Boere en Boerinne wille gaon inzette um de Boerebroélof tot ein grandioos succes te make.
De Boerebroélof 2021 wuurt gevierd op vastelaovesdinsdaag 16 fibberwari.